حدیث ثقلین

ایک حدیث زبان زدِعام و خاص چلی آ رہی ہے کہ حضورﷺ نے اپنے آخری دنوں میں فرمایا میں تم میں دو بھاری چیزیں چھوڑے جا رہا ہوں اسے حدیث ثقلین کہتے ہیں اس مضمون میں اس روایت کے رواۃ اور مخارج پر طلبہ حدیث کو متوجہ کرنا پیش نظر ہے لیکن اس سے پہلے لفظ ثقل (بھاری ) کو کچھ سمجھ لیں ثقلین اسی کا تثنیہ ہے.

اللہ رب العزت نے حضورﷺ کو ابتداء وحی میں بتلا دیا تھا کہ آپ پر قرآن ایک وزن دار پیرائے میں اتارا جائے گا ارشاد ہوا

اِنَّا سَنُلۡقِیۡ عَلَیۡکَ  قَوۡلًا  ثَقِیۡلًا (پارہ 29 المزمل ، آیت 3 )

ترجمہ: ہم ڈالنے والے ہیں تجھ پر ایک بات وزن دار (شیخ الہند رحمۃ اللہ علیہ )

یہاں قرآن پاک کو ایک قول کے مطابق ثقیل کہا گیا ہے حدیث بھی وحی خداوندی سے ہے( گو یہ بصورتِ وحی غیر متلو ہو ) تو ظاہر ہے کہ وہ بھی ایک پیرایہ، ثقل ہی ہوگا سو ان دونوں کو (قرآن اور حضورﷺ کی حدیث کو) ثقلین کہیں گے، حدیث بھی کفار پر اسی طرح بھاری ہے جس طرح قرآن بھاری ہے۔

اس بات سے پتہ چلتا ہے کہ حضورﷺ پر جب وحی حضرت جبرائیل ؑ آپ کے سامنے انسانی صورت میں متمثل ہوئے بغیر لاتے تو آپﷺ پر بہت گراں ہوتی تھی یہاں تک کہ آپ پسینہ پسینہ ہو جاتے تھے۔

شیخ الاسلام علامہ شبیر احمد عثمانی ؒ لکھتے ہیں *قرآن تم پر نازل کریں گے جو اپنی قدر و منزلت کے اعتبار سے بہت قیمتی اور وزن دار اور اپنی کیفیات و لوازم کے اعتبار سے بہت بھاری اور گرانبار  ہے۔احادیث میں ہے کہ نزول قرآن کی یہ صورت آپﷺ پر بہت گراں اور سخت گزرتی تھی۔ جاڑے (سردی)کے موسم میں آپﷺ پسینہ پسینہ ہو جاتے تھے اگر اس وقت کسی سواری پر سوار ہوتے تو سواری تحمل نہ کر سکتی تھی ایک دفعہ آپﷺ کی ران مبارک زید بن ثابت کی ران پر تھی اس وقت وحی نازل ہوئی اس وقت زید بن ثابتؓ کو ایسا محسوس ہوا کہ انکی ران بوجھ سے پھٹ جائے گی۔ اس کے علاوہ اس ماحول میں قرآن کی دعوت تبلیغ اور اس کے حقوق کا پوری طرح ادا کرنا اور اس راہ میں تمام سختیوں کو کشادہ دلی سے برداشت کرنا بھی سخت مشکل اور بھاری کام تھا اور جس طرح ایک حیثیت سے یہ کلام آپﷺ پر بھاری تھا دوسری حیثیت سے کافروں اور منکروں پر شاق تھا۔ غرض ان تمام وجوہ کا لحاظ کرتے ہوئے آنحضرتﷺ کو حکم ہوا کہ جس قدر قرآن اتر چکا ہے اس کی تلاوت میں رات کو مشغول رہا کریں اور اس خاص عبادت(تہجد ) کے انوار سے اپنے تئیں مشرف کر کے اس فیض اعظم کی قبولیت کی استعداد اپنے اندر مستحکم فرمائیں۔ رات کو اٹھنا کچھ آسان کام نہیں بڑی بھاری ریاضت اور نفس کشی ہے جس سے نفس روندا جاتا ہے اور نیند آرام وغیرہ کی خواہشات پامال کی جاتی ہیں نیز اس وقت دعا اور ذکر سیدھا دل سے ادا ہوتا ہے اور زبان اور دل موافق ہوتے ہیں ۔(تفسیر عثمانی صفحہ 762 طبع سعودی عرب )

حضورﷺ نے اس صورت وحی کو اپنے لیے وهو اشده على فرمایا کہ وہ مجھ پر بہت سخت پیرائے میں آتی ہے۔

اس پس منظر کے ساتھ قرآن کریم اور حضورﷺ کی سنت کو ثقلین ماننا اور سمجھنا کچھ مشکل تھا اس لیے آپﷺ نے اسے دوسرے لفظوں میں آسان کر کے بھی بیان کردیا اور لفظ امرین سے ذکر کیا ۔حدیث کی سب سے پہلی معروف کتاب موطا امام مالک میں اسے اس طرح روایت کیا گیا ہے۔ آپﷺ نے فرمایا :

اني تركت فيكم امرين لن تضلوا ما تمسكتم بهما كتاب الله وسنه نبيه صلی اللّه علیہ وسلم (موطا امام مالک صفحہ 363 )

ترجمہ: میں تم میں دو چیزیں چھوڑ رہا ہوں (امرین) تم جب تک اپنا دین ان سے لیتے رہو گے تم کبھی گمراہ نہ ہوگے۔ وہ دو چیزیں کیا ہیں؟؟

1_  اللہ کی کتاب

2_ میری سنت

حضورﷺ نے اپنی ان دونوں امانتوں کا کن حضرات کو امین بتایا ؟ انہیں ہی جو اس وقت ترکت فیکم میں ضمیر منکم کا مصداق تھے یعنی صحابہ کرامؓ۔ اس میں آپ نے متنبہ فرمایا کہ قرآن کی بھی وہی تشریحات معتبر ہونگی جو صحابہؓ نے سمجھیں اور سنت کی بھی وہی مرادات تمہارے لئے مشعل راہ ہوں گی جو صحابہؓ سے ملیں دین ہے ہی وہی جو صحابہؓ سے ملے ۔

حضرت امام مالک رحمۃ اللہ (179ھ) تقریباً سب بڑے بڑے محدثین کے استاد ہیں وہ خود بھی اسے حضورﷺ سے نقل کرتے تو ہمارے لئے ان کا بلغنی کہنا  کافی تھا لیکن اسے مرسل مانا  جائے تو وہ اسے کسی جلیل القدر تابعی سے روایت کر رہے ہیں اور اس تابعی نے حضورﷺ سے نہیں سنا محدثین کی اصطلاح میں اسے حدیث مرسل کہتے ہیں ۔خطیب تبریزی ؒ نے اسے مرسل کہا ہے اور حدیث مرسل کے بارے میں حنفیہ اور مالکیہ کا موقف یہ ہے کہ وہ معتبر ہے ۔سو یہ حدیث موطا  امام مالک مرسل ہوئی اب اس مرسل کو  موصول ثابت کرنا یہ اس پر زائد ایک دوسری محنت ہے جو علماء مالکیہ نے اس پر کی ہے ان میں ان کے سرخیل حضرت امام ابن عبد البر مالکی ؒ (462ھ) ہیں، آپ نے اسے موصولاً بھی کتاب التمہید اور الاستذکار میں روایت کیا ہے۔سو یہ نہیں کہا جا سکتا کہ حدیث ثقلین صرف مرسل ہے یہ مرسلاً اور موصولاً دونوں طرح مروی ہے۔

یہ عجیب بات ہے کہ حدیث کی مرکزی کتابوں میں یہ حدیث صرف موطا امام مالک میں ہے ایسا نہیں ایک پہلو سے اس کے کچھ نقوش صحیح مسلم میں بھی ملتے ہیں ۔

ایک دفعہ یزید بن حیان ؒ، حصین بن سبرہ ؒ اور عمر بن مسلم ؒ تین  تابعی اکھٹے حضرت زید بن ارقمؓ (66ھ)کی خدمت میں گئے اور حصین ؒ نے آپ سے کہا :

لقَدْ لَقِيتَ يا زَيْدُ خَيْرًا كَثِيرًا، رَأَيْتَ رَسولَ اللهِ صَلَّى اللَّهُ عليه وَسَلَّمَ، وَسَمِعْتَ حَدِيثَهُ، وَغَزَوْتَ معهُ، وَصَلَّيْتَ خَلْفَهُ لقَدْ لَقِيتَ يا زَيْدُ خَيْرًا كَثِيرًا، حَدِّثْنَا يا زَيْدُ ما سَمِعْتَ مِن رَسولِ اللهِ صَلَّى اللَّهُ عليه وَسَلَّمَ، قالَ: يا ابْنَ أَخِي وَاللَّهِ لقَدْ كَبِرَتْ سِنِّي، وَقَدُمَ عَهْدِي، وَنَسِيتُ بَعْضَ الذي كُنْتُ أَعِي مِن رَسولِ اللهِ صَلَّى اللَّهُ عليه وَسَلَّمَ، فَما حَدَّثْتُكُمْ فَاقْبَلُوا، وَما لَا، فلا تُكَلِّفُونِيهِ، ثُمَّ قالَ: قَامَ رَسولُ اللهِ صَلَّى اللَّهُ عليه وَسَلَّمَ يَوْمًا فِينَا خَطِيبًا، بمَاءٍ يُدْعَى خُمًّا بيْنَ مَكَّةَ وَالْمَدِينَةِ، فَحَمِدَ اللَّهَ وَأَثْنَى عليه، وَوَعَظَ وَذَكَّرَ، ثُمَّ قالَ: أَمَّا بَعْدُ، أَلَا أَيُّهَا النَّاسُ فإنَّما أَنَا بَشَرٌ يُوشِكُ أَنْ يَأْتِيَ رَسولُ رَبِّي فَأُجِيبَ، وَأَنَا تَارِكٌ فِيكُمْ ثَقَلَيْنِ: أَوَّلُهُما كِتَابُ اللهِ فيه الهُدَى وَالنُّورُ فَخُذُوا بكِتَابِ اللهِ، وَاسْتَمْسِكُوا به فَحَثَّ علَى كِتَابِ اللهِ وَرَغَّبَ فِيهِ، ثُمَّ قالَ: وَأَهْلُ بَيْتي أُذَكِّرُكُمُ اللَّهَ في أَهْلِ بَيْتِي، أُذَكِّرُكُمُ اللَّهَ في أَهْلِ بَيْتِي، أُذَكِّرُكُمُ اللَّهَ في أَهْلِ بَيْتي فَقالَ له حُصَيْنٌ: وَمَن أَهْلُ بَيْتِهِ؟ يا زَيْدُ أَليسَ نِسَاؤُهُ مِن أَهْلِ بَيْتِهِ؟ قالَ: نِسَاؤُهُ مِن أَهْلِ بَيْتِهِ، وَلَكِنْ أَهْلُ بَيْتِهِ مَن حُرِمَ الصَّدَقَةَ بَعْدَهُ، قالَ: وَمَن هُمْ؟ قالَ: هُمْ آلُ عَلِيٍّ وَآلُ عَقِيلٍ، وَآلُ جَعْفَرٍ، وَآلُ عَبَّاسٍ قالَ: كُلُّ هَؤُلَاءِ حُرِمَ الصَّدَقَةَ؟ قالَ: نَعَمْ (صحیح مسلم جلد 2 صفحہ279 طبع دہلی )

ترجمہ: خطبہ غدیر خم خبردار رہو اے لوگو! میں بھی بشر ہوں قریب ہے کہ خدا کا بھیجا فرشتہ (ملک الموت)میرے پاس آئے اور میں ہاں کہہ دوں اور میں تم میں دو بھاری چیزیں( ثقلین) چھوڑ کر جا رہا ہوں ان میں سے پہلی اللہ کی کتاب (قرآن )ہے جس میں ہدایت اور نور ہے تم سب اس اللہ کی کتاب کو لو اور اس سے تمسک کرو .(تمسک اس پر عمل اور اس سے استدلال  دونوں کو شامل ہے).

(نوٹ ) اولها  کے بعد حضرت زید بن ارقمؓ نے حضورﷺ سے ثانیھما کے لفظ سے کوئی بات روایت نہیں کی اور قرآن پاک  پر عمل کرنے کی ہی تاکید فرماتے رہے اور اس کی ترغیب دیتے رہے مگر وہ سارے الفاظ اس روایت مسلم میں نہیں ہیں اس کے بعد حضرت زیدؓ  نے حضورﷺ سے خطبہ کے الفاظ روایت کئے ہیں :

اور میرے اہل بیت میں اپنے اہل بیت کے بارے میں تمہیں خدا کی یاد دلاتا ہوں (آپ نے تین دفعہ یہ بات کہی) اس پر حصین بن سبرہ ؒ نے حضرت زیدؓ سے پوچھا حضورﷺ کے اہل بیت کون ہیں کیا آپ کی ازواج آپﷺ کے اہل بیت میں نہیں؟ آپ نے فرمایا بے شک آپ کی ازواج آپ کے اہل بیت میں سے ہیں لیکن اس روایت میں اہل بیت سے مراد آپ کے خاندان کے وہ لوگ ہیں جن پر آپ کے بعد صدقہ لینا حرام ہے  حضرت حصین ؒ نے پوچھا وہ کون کون ہیں؟ حضرت زیدؓ نے بتلایا

آل علي وال عقيل و ال جعفر وال عباس قال کل ھولاء ۔حرم الصدقہ قال نعم

حضرت حصین ؒ نے پھر پوچھا کیا ان سب پر صدقہ لینا حرام ہے ؟حضرت زیدؓ نے کہا ہاں!

ایک سوال اور اس کا جواب

حضرت زیدؓ نے ان آنے والے تینوں حضرات کے سامنے پہلے کہہ دیا تھا

قال يا ابن اخي والله لقد كبرت سني وقدم اھدی و نسيت بعض الذي كنت اعی

ترجمہ: اے میرے بھتیجے بخدا میری عمر بڑی ہو گئی اور میرا وقت آ لگا ہے اور میں کئی باتیں جنہیں میں یاد رکھتا تھا بھول چکا ہوں ۔

اس پر آپ نے انہیں کہا تھا کہ میں جو کچھ تمہارے پاس بیان کروں اسے لے لو اور جو نہ بیان کر پاؤں تم اس کی مجھے تکلیف نہ دو ۔

سو یہ تینوں تابعی بزرگ آپ کی اس بات پر قائم رہے اور آپؓ نے یہ نہ کہا کہ ان دو بھاری باتوں میں (ثقلین ) میں ایک تو کتاب اللہ ہوئی اور دوسری کونسی ہے اسے آپ اپنے تسلسل کلام میں چھوڑ گئے ہیں ؟

ظاہر ہے کہ وہ سنت ہی ہوگی ثقلین میں کتاب اللہ کے بعد دوسرا درجہ سنت کا ہے اس پر قرآن پاک نے اطیعواللہ و اطیعوالرسول کہہ کر پوری مہر تصدیق ثبت کردی ہے ۔سو دوسرے درجے میں سنت کے لفظ سے کسی صورت میں انکار نہیں کیا جاسکتا یہ مضمون قرآن کریم میں دو سو دفعہ سے زیادہ ملے گا اور اس پر سینکڑوں حدیثیں شاہد ہیں حضرت علی المرتضیؓ بھی آخری دم تک ایمان والوں کو یہی نصیحت کرتے رہے کہ ان دو سنتوں کو ہمیشہ قائم رکھنا اور یہ دو چراغ ہمیشہ جلائے رکھنا ۔

شیعہ عالم شریف رضی(400ھ) نہج البلاغہ میں حضرت علیؓ کے نصائح وصایا میں آپ سے نقل کرتا ہے جب آپ پر ابن ملجم ملعون نے ضرب لگائی تو آپؓ نے وصیت کی :

اما وصيتي فالله لا تشركوا به شيئا و محمد صلى الله عليه واله وسلم فلا تضيعوا سنته اقيموا هذين العمودين واوقدوا هذين المصباحين (نہج البلاغہ وصیت 23 صفحہ 668 مترجم طبع مغل حویلی موچی دروازہ لاہور)

ترجمہ: سنت کے ذکر کے بعد امور دین( دو ستون) اورمصباحین( دو چراغ ) کے الفاظ بتارہے ہیں کہ پہلے اس وصیت میں کتاب اللہ کا ذکر ہو چکا ہے جسے شریف رضی پہلے کسی جگہ ذکر کرآ یا ہے اور اب حضورﷺ کی سنت کو ضائع نہ کرنے کا درس روایت کر رہا ہے ظاہر کلام سے بھی یہی مفہوم ہوتا ہے کہ حضرت علی المرتضیؓ کی وصیت میں یہاں کتاب اللہ کے بعد حدیث کا لفظ ضرور ہوگا جسے شریف رضی اس تسلسل میں محفوظ نہیں رکھ سکا

تاہم اس سے انکار کی کوئی راہ نہیں مل سکتی کہ شریعت محمدی میں علم کا دوسرا ماخذ سنت ہی ہے تیسرے نمبر پر امت اس کی مکلف ہے کہ وہ ان دونوں ستونوں کو کہیں گرنے نہ دے اور ان دو چراغوں کو کبھی بجھنے نہ دے ۔پھر یہ بات بھی کسی مؤمن کے دماغ سے نہ نکلے کے لفظ امت میں صحابہؓ و اہلبیتؓ دونوں مل کر شامل ہیں اگر حدیث ثقلین کتاب اللہ اور اہل بیتؓ کو بیان کرے تو اس میں یہ سقم باقی رہے گا کہ حضور کی پھر سنت کہاں گئی؟اسے تو کسی حیلہ سے بھی اسلام کے ماخذ علم سے نکالا نہیں جا سکتا خطبہ غدیر خم کے حوالے سے ایک روایت عام سنی جاتی ہے کہ آپﷺ نے ایک موقع پر فرمایا :من کنت مولاہ فعلی مولاہ اس میں اکثر ذاکرین کتاب اللہ کے بعد حضرت علیؓ کا نام لیتے ہیں ۔

اس روایت میں ثقلین میں سے کسی کا ذکر نہیں نہ قرآن کا نہ سنت کا اور صحیح مسلم کی زید بن ارقم رضی اللہ عنہ کی روایت میں غدیر خم کے خطبہ میں ثقلین کا لفظ بھی موجود ہے اور اولهما  کتاب اللہ کے الفاظ بھی موجود ہیں اور اس حدیث میں من کنت مولاہ کا کہیں ذکر نہیں ۔معلوم ہوتا ہے کہ روایت میں کنت مولاہ بظاہر غدیر خم کی بات نہیں خطبہ غدیر خم کی صحیح روایت وہی رہی ہے جو صحیح مسلم میں ہے اور اس میں وثانيهما کے الفاظ بھی کہیں نہیں ملتے آپ اس خطبہ میں وہ ذکر نہ کر پائے۔

امام مسلم ؒ سے پہلے حضرت امام احمد بن حنبل ؒ نے بھی حضرت زید بن ارقمؓ کی اس روایت کو روایت کیا ہے اس میں بھی وثانيهما کے الفاظ نہیں ملے اب سوائے اس کے کچھ نہیں کہا جا سکتا ہے کہ یہاں سنت کا لفظ کرنا حضرت زیدؓ کو یاد نہ رہا اور آخر میں وہ اہل بیت کو یاد رکھنے کی بات پر نکل آئے اور ظاہر ہے کہ اہل بیت کے حقوق کا کوئی مسلمان انکار نہیں کر سکتا اور اس سب تفصیل کا حاصل یہی نکلتا ہے کہ حدیث ثقلین میں اہل بیت یا سنت کا لفظ بغیر ثقل ثانی کسی صحیح سند سے نہیں ملتا ۔

اہل سنت کی کتب حدیث میں جن کتابوں میں اہل بیت کے ثقل ثانی ہونے کی روایت ملتی ہے اس میں کوئی نہ کوئی شیعہ راوی ضرور ملتا ہے ظاہر ہے کہ اس کی کوئی روایت اہل سنت پر حجت نہیں ہو سکتی ان روایات کی تحقیق مطلوب ہو تو اس کے لیے حضرت مولانا محمد نافع ؒ کی کتاب لاجواب حدیث ثقلین کا مطالعہ کریں

حدیثِ ثقلین کے ایک طُرق میں خلیفتین کے الفاظ کی حقیقت

السلام علی من اتبع الھدیٰ

کچھ دن قبل مجھے شیعوں کی جانب سے ایک تحریر موصول ہوٸی جس میں انہوں نے ایک روایت کو دلیل بنا کر حضرت علیؓ کو خلیفہِ اول ثابت کرنے کی ناکام کوشش کی تھی۔
وہ روایت مشہور حدیث، حدیثِ ثقلین تھی جس کا ایک طُرق جس کی سند میں شریک بن عبداللہ النخعی تھا اور اس میں الفاظ ”الثقلین“ کی بجاۓ ”الخلیفتین، پیش کیا شیعوں نے۔

وہ طُرق کچھ یوں ہے،
شریک بن عبداللہ اپنی سند سے زید بن ثابتؓ سے روایت کرتا ہے کہ نبیﷺ نے فرمایا

”أنی تارک فیکم الخلیفتین من بعدی….“

میں تم میں اپنے بعد دو خلیفے چھوڑ کر جا رہا ہوں،ایک اللہ کی کتاب اور دوسرا میرے اہلبیت،یہ دونوں ہرگز جدا نہیں ہوں گے یہاں تک کہ حوض پر میرے پاس آجائیں۔

(مصنف ابن ابی شیبہ،جلد 9،روایت نمبر 32337)

اور یہ روایت شریک بن عبداللہ النخعی کی اسی سند کے ساتھ مسند احمد بن حنبل میں بھی انہیں الفاظ کے ساتھ موجود ہے۔

دیکھیں

(مسند احمد،جلد 10،روایت نمبر 21911)

ان الفاظ کو شیعوں نے دلیل بنا کر یہ ثابت کرنے کی ناکام کوشش کی ہے کہ یہاں نبیﷺ حضرت علیؓ کو اپنے بعد پہلا خلیفہ بنا رہے ہیں۔

جبکہ اس روایت میں یہ الفاظ غیر محفوظ ہیں اور اصل الفاظ ”ثقلین“ کے ہیں کہ ”تمہارے درمیان اپنے بعد دو بھاری/عظیم چیزیں چھوڑ کر جا رہا ہوں“۔

اس روایت میں الفاظ کے بدلنے کی وجہ شریک بن عبداللہ ہے جس کا حافظہ خراب تھا اور روایت میں بہت زیادہ غلطیاں کیا کرتا تھا۔پہلے اس راوی کے حالات بیان کریں گے ہم اس کے بعد اس روایت کے بارے میں ثابت کریں گے کہ دیگر اسناد میں یہاں الفاظ ”ثقلین“ ہی ہیں نہ کہ ”خلیفتین“۔

امام ابن حجر عسقلانیؒ شریک کے ترجمے میں لکھتے ہیں۔
”آٹھویں طبقہ کا صدوق راوی ہے بکثرت غلطیاں کرتا تھا جب قاضی بنا تو اس کا حافظہ بدل گیا“۔

(تقریب التہذیب،جلد 1،صحفہ نمبر 377)

امام ذھبیؒ نے اس کا طویل ترجمہ نقل کیا ہے۔

لکھتے ہیں!
”عبدالجبار بن محمد نے امام یحیی بن سعید القطانؒ سے کہا کہ لوگ کہتے ہیں شریک آخری عمر میں اختلاط کا شکار ہو گیا تھا،تو انہوں نے جواب دیا وہ تو شروع سے ہی اختلاط کا شکار تھا،جوزجانی کہتے ہیں یہ بُرے حافظے کا مالک تھا حدیث میں اضطراب کا شکار ہوتا تھا،ابراہیم بن سعید جوہری کہتے ہیں شریک نے چار سو احادیث میں غلطی کی ہے،امام یحیی بن معینؒ کہتے ہیں شریک نامی راوی ثقہ ہے لیکن یہ غلطی کرتا ہے،شریک کا بیٹا عبدالرحمنٰ کہتا ہے میرے والد کے پاس دس ہزار غریب روایات تھیں،امام دارقطنیؒ فرماتے ہیں شریک جس روایت کو نقل کرنے میں منفرد ہو اس میں قوی شمار نہیں ہو گا،امام ابوحاتم رازیؒ فرماتے ہیں شریک سے روایات میں غلطیاں منقول ہیں،امام ابوزرعہؒ فرماتے ہیں شریک نے بکثرت احادیث نقل کی ہیں لیکن یہ وہم کا شکار ہو جاتا ہے اور بعض اوقات غلطی کر جاتا ہے“۔

(میزان الاعتدال،جلد 3،صحفہ نمبر 367)

ان سب سے معلوم ہوتا ہے کہ شریک بن عبداللہ کا حافظہ بہت زیادہ خراب تھا اور روایات میں بکثرت غلطیاں کیا کرتا تھا اور جس روایت میں یہ منفرد ہو وہ قابل قبول نہیں۔

یہی معاملہ یہاں ہے کہ شریک ”خلیفتین“ کے الفاظ روایت کرنے میں منفرد ہے اور کسی دوسری صحیح سند جس میں شریک نہ ہو اس میں ”خلیفتین“ کے الفاظ موجود ہی نہیں ہیں،بلکہ باقی ہر روایت میں ”الثقلین“ کے الفاظ ہی موجود ہیں۔

امام طبرانی نے جب شریک کی سند سے یہ روایت نقل کی جس میں ”الخلیفتین“ کے الفاظ موجود ہیں تو پھر شریک ہی کی سند سے اگلی روایت میں ”الثقلین“ کے الفاظ نقل کیے جس سے معلوم ہوتا ہے کہ امام طبرانی کے نزدیک بھی ”الثقلین“ کے الفاظ ہی محفوظ شدہ ہیں۔

امام طبرانی لکھتے ہیں!

”حدثنا عبید بن غنام ثنا ابوبکر بن ابی شیبہ ثنا شریک عن الرکین بن الربیع عن القاسم بن حسان عن زید بن ثابتؓ قال،قال رسولﷺ أنی قد ترکت فیکم الخلیفتین کتاب اللہ وعترتي….“۔

پھر نقل کرتے ہیں!

”حدثنا عبید بن غنام ثنا ابوبکر بن ابی شیبہ ثنا عمر بن سعد ثنا شریک عن الرکین بن الربیع عن القاسم بن حسان عن زید بن ثابتؓ قال یرفعہ رسولﷺ وقال أنی تارک فیکم الثقلین من بعدی کتاب اللہ وعترتی اھل بیتی….“۔
(معجم الکبیر،جلد 5،روایت نمبر 4922،4923)

اس سے ثابت ہوتا ہے کہ امام طبرانی کے نزدیک بھی اصل و محفوظ الفاظ ”الثقلین“ ہی ہیں نہ کہ ”الخلیفتین“۔

اب ہم دیگر اسناد و راویان کی روایات نقل کر کے ثابت کریں گے کہ اصل الفاظ ”ثقلین“ ہی ہیں۔

امام حاکم اپنی مستدرک میں نقل کرتے ہیں!

”حضرت زید بن ارقمؓ فرماتے ہیں نبیﷺ نے فرمایا

”انی تارک فیکم الثقلین کتاب اللہ واھل بیتی…“

میں تم میں دو بھاری چیزیں چھوڑ کر جا رہا ہوں پہلی اللہ کی کتاب اور دوسری میرے اہلبیت یہ دونوں ایک دوسرے سے جدا نہیں ہوں گے حتیٰ کہ یہ میرے پاس حوض پر آجائیں“۔

(المستدرک الحاکم،جلد 4،روایت نمبر 4711)

امام مسلم بھی طویل حدیث ثقلین کو اپنی صحیح میں حضرت زید بن ارقمؓ کی سند سے لے کر آۓ،وہ نقل کرتے ہیں!

”حضرت زید بن ارقمؓ نے فرمایا نبیﷺ ایک دن مکہ اور مدینہ کے درمیان واقع ایک پانی کے کنارے جسے خُم کہا جاتا ہے ہمیں خطبہ دینے کے لۓ کھڑے ہوۓ جس میں فرمایا

”انا تارک فیکم ثقلین،اولھما کتاب اللہ،ثم قال واھل بیتی“

میں تم میں دو عظیم چیزیں چھوڑ کر جا رہا ہوں،ان میں سے پہلی اللہ کی کتاب ہے….اور پھر فرمایا (دوسری) میرے اہلبیت….“

(صحیح مسلم،حدیث نمبر 6225)

یہاں پر حضرت زید بن ارقمؓ کی گواہی مل رہی ہے کہ نبیﷺ نے خم کے مقام پر ”الثقلین“ کے الفاظ ہی ارشاد فرماۓ نہ کہ ”الخلیفتین“ کے۔

ایک بار حضرت علی بن ربیعہؒ،حضرت زید بن ارقمؓ سے ملے تو پوچھا کیا آپ نے نبیﷺ کو یہ فرماتے ہوۓ سُنا ہے کہ

”انی تارک فیکم الثقلین ؟“

تو انہوں نے فرمایا ”ہاں“۔

(المسند الجامع لاحادیث الکتب السنة،جلد 5،صحفہ نمبر 509)

یہاں پر بھی حضرت زید بن ارقمؓ اس بات کی صراحت فرما رہے ہیں کہ نبیﷺ نے یہ جملہ ارشاد فرمایا تھا

”انی تارک فیکم الثقلین“۔

شیعوں کے معتبر ترین زاکرین میں سے ایک ملاباقر مجلسی ہے جس نے اپنی کتاب بحار الانوار میں پانچ سے چھ اسناد سے حدیث ثقلین نقل کی ہے جن میں ”الثقلین“ ہی کے الفاظ ہیں ان میں سے دو میں ذیل میں پیش کر رہا ہوں۔

ملا باقر مجلسی اپنی سند سے حضرت علیؓ سے روایت کرتا ہے کہ نبیﷺ نے فرمایا!

”قد ترکت فیکم الثقلین کتاب اللہ وعترتی اھل بیتی فانہما لن یفتروقا حتی یردا علی الحوض“۔

کہ میں تم میں دو چیزیں چھوڑ کر جا رہا ہوں ایک اللہ کی کتاب دوسرا میرے اہلبیت ان میں سے کوٸی بھی ایک دوسرے سے جدا نہ ہو گا یہاں تک کہ حوض پر آجاٸیں۔

اور پھر حضرت زید بن ارقمؓ کی سند سے نبیﷺ کا فرمان نقل کیا کہ آپﷺ نے فرمایا!

”انی تارک فیکم الثقلین کتاب اللہ وعترتی اھل بیتی فانہما لن یفتروقا حتی یردا علی الحوض“۔

کہ میں تم میں دو چیزیں چھوڑ کر جا رہا ہوں ایک اللہ کی کتاب دوسرا میرے اہلبیت ان میں سے کوٸی بھی ایک دوسرے سے جدا نہ ہو گا یہاں تک کہ حوض پر آجائیں۔

(بحار الانوار،جلد 23،صحفہ نمبر 133)

ملا باقر مجلسی نے اپنی کتاب میں شریک بن عبداللہ کی سند سے وہ روایت بھی نقل کی ہے جس میں ”الخلیفتین“ کے الفاظ ہیں لیکن شیعوں نے خود ہی حواشی میں اس بات کی صراحت کر دی کہ یہاں الفاظ ”الثقلین“ ہیں۔

دیکھیں

(بحارالانوار،جلد 23،صحفہ نمبر 135)

اس سب سے ثابت ہوتا ہے کہ حدیثِ ثقلین میں محفوظ الفاظ ”الثقلین“ ہی ہیں نہ کہ ”الخلیفتین“ اور صرف اسی سند میں ”خلیفتین“ کے الفاظ ہیں جس میں شریک بن عبداللہ نخعی موجود ہے،جس کا حافظہ خراب تھا اور حدیث میں بکثرت غلطیاں کرتا تھا،اور ان الفاظ کے ساتھ وہ روایت کرنے میں منفرد ہے جس وجہ سے اس کی روایت قبول نہیں کی جا سکتی اور حضرت علیؓ سے بھی ”الثقلین“ ہی کے الفاظ ثابت ہیں نہ کہ ”خلیفتین“ کے۔